Талғат Мұқышевтың орындауындағы күйлер

Талғат Мұқышевтың орындауындағы күйлер

Талғат Мұқышевтың орындауындағы күйлер

Мұқышев Талғат Кәріпжанұлы 1962 жылы маусым айының 10 күні Шығыс Қазақстан облысы Тарбағатай ауданы Ақсуат ауылында дүниеге келген. Сыбызғышы, Қазақстан Республикасының «Мәдениет қайраткері» (2005), өнертану ғылымдарының кандидаты (2010), Құрманғазы атындағы Қазақ Ұлттық консерваториясының доценті (2012). Оңтүстік Кореяда өткен «Фири» халықаралық дәстүрлі музыка фестивалінің (I жүлде, 1997), Ресейде өткен «Курай» сыбызғышылар мен қурайшылар халықаралық конкурсының (III жүлде, 2005), Өзбекстанда өткен «Шарқ тароналары» халықаралық дәстүрлі музыка конкурс-фестивалінің лауреаты, (1999), Алматыда Құрманғазының 175 жылдығында өткен «Құрманғазы және Ұлы Дала музыкасы» халықаралық дәстүрлі аспаптық музыка конкурс-фестивалінің (I жүлде, 1998), «Күй керуен» дәстүрлі аспаптық музыка халықаралық конкурс-фестивалінің (II жүлде, 2006) лауреаты. 1994 жылы Уфа (Ресей) мемлекеттік консерваториясын қурай-сыбызғы мамандығы бойынша бітірді. 2003 жылы Құрманғазы атындағы Қазақ ұлттық консерваториясының аспирантурасын тамамдады. 1997–2000 жылдары «Республикалық Ұлан» президенттік оркестрінің, 2000–2005 жылдары Құрманғазы атындағы ұлт аспаптары оркестрінің жеке орындаушы-сыбызғышы қызметін атқарды. Т.Мұқышев орындаған сыбызғы күйлері Қазақ радиосының «Алтын қорына» енді. Ол «Естайдың Қорланы» спектаклі мен «Көшпенділер» кинофильмін сыбызғы үнімен дыбыстандырды. Германия, Франция, Италия, Бельгия, Голландия, Мысыр, Оңтүстік Корея, Қытай, Түркия, Ресей, Өзбекстан т.б. шет елдерде қазақ сыбызғышылық өнерін әлемге танытты. 2007 жылы Абай атындағы Мемлекеттік академиялық опера және балет театрында «Мәңгілік сарын» атты және 2011 жылы ел тәуелсіздігінің 20 жылдығына арнап Ықылас атындағы саз аспаптары мұражайында «Сыбызғы сазы» атты жеке шығармашылық кешін өткізді. 2005 жылы сыбызғы күйлерінен өз орындауында жеке үнтаспа жазып шығарды. Т. Мұқышев халық арасынан (Қазақстан, Моңғолия, Қытай) 100-ге тарта қазақ сыбызғы күйлерін тауып, нотаға түсірді. Ол өзі тауып жинаған халық мұрасын Елбасының «Мәдени мұра» бағдарламасы аясында, ҚР Мәдениет министрлігінің қолдауымен шыққан «Қазақтың дәстүрлі 1000 күйі» антологиясына және «Мәңгілік сарын» атты қобыз және сыбызғы күйлері жинағына әкеп қосты. Осы антологиялардың кіріспесін жазды. Жинаған күйлері негізінде «Өнер» баспасынан «Сыбызғы сазы» атты оқу құралын шығарды. Т.К. Мұқышев өнер мен ғылымды ұштастырған дарын иесі.