Мұрат Әбуғазының орындауындағы күйлер

Мұрат Әбуғазының орындауындағы күйлер

Мұрат Әбуғазының орындауындағы күйлер

Әбуғазы Мұрат Қазенұлы – күйші-домбырашы, Құрманғазы атындағы Қазақ Ұлттық консерваториясының доценті. 1974 жылы 5-желтоқсанда Шығыс Қазақстан облысы, Тарбағатай ауданы (бұрынғы Семей облысы, Ақсуат ауданы) Ақсуат ауылында дүниеге келген. 1990–1994 жылдары П.И. Чайковский атындағы Алматы музыка училищесін Қазақстан Республикасының «Білім беру ісінің үздігі», ұстаз Қ. Рақышеваның класында оқыған. 1994–1999 жылдары Құрманғазы атындағы қазақ ұлттық консерваториясында, профессор А. Тоқтағанның класынан дәріс алған. 2000 жылдан Құрманғазы атындағы қазақ ұлттық консерваториясының «Халық әні» кафедрасында домбыра пәнінің оқытушысы, сонымен қатар кафедра меңгерушісі міндетін атқарушы қызметінде істеген. Халықаралық, республикалық конкурстардың лауреаты. Бірнеше оқу-методикалық кітаптардың авторы. «Құрманғазы» (2005 ж.), «Тәттімбет және Арқа күйлері» (2005 ж.), «Сүгір. Қаратау шертпесі» (2006 ж.), «Жетісу ақындарының жыр сарындары» (2008 ж.), «Әшім және Іле аймағының күйлері» (2008 ж.), «Сарыарқа әндері» (2009 ж.), «Шығыстың шыңырау күйлері» (2010 ж.) т.б. Сонымен қатар «Мәдени мұра» бағдарламасы аясында шыққан «Қазақтың дәстүрлі 1000 күйі» (2009 ж.), «Қазақтың дәстүрлі 1000 әні» (2010 ж.) антологияларын құрастыруға қатысты және мақала авторларының бірі ретінде енген. Халықаралық ғылыми-практикалық конференцияларға қатысып, күй өнері жөнінде оқыған баяндамалары көптеген ғылыми мақалалар жинағында жарық көрген. М. Әбуғазы күйші-орындаушы ретінде дәстүрлі музыка фестивальдері, республикалық телеарналар арқылы күйшілік өнерді насихаттап, еңбек етіп келеді. Хабар телеарнасындағы «Алтыбақан», Қазақстан Ұлттық телеарнасындағы «Жетісаз», «Қазақтың жаны», «Дала думаны», «Саз толғау» т.б. телевизиялық хабарлар арқылы республика жұртшылығына домбырашы күйші ретінде кеңінен танылды. Сол сияқты дәстүрлі музыка фестивальдеріне үнемі қатысып, ел ризашылығына бөленіп жүрген өнерпаз. «Мәңгілік сарын» (2005–2008), «Күй керуені» (2006), «Мәдени Азиада» (2011), «Астана Арқау» (2009–2013), т.б. тәрізді дәстүрлі музыка фестивальдеріне қатысып, өнер көрсетіп жүр. Сонымен қатар орындаған күйлері қазақ радиосының алтын қорына енген. М. Әбуғазы шығармашылық жеке концерттерін жоғарғы деңгейде өткізіп келеді. Алматы қаласында 2003 жылы «Күй көтерер көңілдің көкжиегін», 2012 жылы өткен «Дүлдүл домбыра, күмбір күй» атты жеке шығармашылық концерттерін атаймыз. 2008 жылы Қазақстан Республикасының Мәдениет Министрлігінің «Мәдениет Қайраткері» белгісімен марапатталды.