Ерболат Мұстафаевтың орындауындағы күйлер

Ерболат Мұстафаевтың орындауындағы күйлер

Ерболат Мұстафаевтың орындауындағы күйлер

Мустафаев Ерболат Жұмашұлы 1963 жылы Қызылорда қаласында туған. 1978 жылы Қызылорда музыкалық училищесіне оқуға қабылданады. 1982 жылы Алматы Мемлекеттік консерваториясына түседі. 1983 жылы Құрманғазы атындағы І Республикалық конкурстың лауреаты. 1985 жылы «Мұрагер» фольклорлық ансамблі құрамында Африканың 7 мемлекеті (Марокко, Гвинея, Гвинея-Бисау, Конго, Гана, Сьерра-Леона, Ангола) және Венгрияда болып өнер көрсетті, жеке домбырашы болды. 1986 жылы Бакуде өткен У. Ғаджібеков І халықаралық конкурстың лауреаты атанды (І орын). 1986–1987 жылдары Құрманғазы атындағы академиялық оркестрде қызмет істеді. 1987–1992 жылдар арасында жолдама арқылы Қазақтың Мемлекеттік ән-би ансамблінде жеке домбырашы және оркестр жетекшісі қызметін атқарды. 1991 жылы Түркияда өнер көрсетті. 1992 жылы Қызылорда қаласына келіп, музыкалық училищеге орналасты. 1998 жылы «Астана» медалімен марапатталды. Осы жылы Ұлыбритания астанасы Лондон қаласында өнер көрсетті. Қазақстан теледидарында үш концерті жазылып алынған. Қазақ радиосында орындаған 70-тен астам күйі бар. 2001 жылы Шымкент қаласында өткен күйшілер сайысында І орынды жеңіп қайтты. 2004 жылы «Ақжелең» Республикалық күйшілер конкурсында Бас жүлде алды. 2006 жылдың қыркүйек айында Алматы қаласында өткен «Күй керуен» фестиваліне қатысты. 2007 жылы жарық көрген «Мәңгілік сарын» антологиясына 3 күй енген. 2009 жылы БАЭ өткен Қазақстанның Мәдени күндеріне қатысты. 2010 жылы шыққан «Қазақтың 1000 күйі» антологиясына Е. Мұстафаевтың орындауындағы 5 күй енді. 2011 жылы «Қайталанбас дауыстар» атты Сыр бойы антологиясына 5 күй енді. 2012 жылы «Қазақстанның еңбек сіңірген қайраткері» атағын алды. 25 алыс-жақын шетелдерде күй өнерін дәріптеген. Қазіргі уақытта Е. Мұстафаев Абай атындағы Қазақ Ұлттық педагогикалық университетінде аға оқытушы қызметін атқарады.